Mánuður: maí 2019

Nýliðakynning 11.–13. júní

Viltu kynna þér golf og fá að prófa?

Þann 11. júní hefst nýliðakynning hjá Golfklúbbi Suðurnesja. Sigurpáll Geir Sveinsson, PGA-golfkennari og íþróttastjóri Golfklúbbs Suðurnesja, mun kynna golfíþróttina fyrir áhugasömum ásamt því að fara yfir grunnatriði. Námskeiðið miðar að þeim sem langar að prófa golf eða eru að stíga sín fyrstu skref í íþróttinni. Miðað er við nýliða og þá sem hafa ekki náð 35 í forgjöf.

Þriðjudagur 11. júní: Kynning og kennsla
Miðvikudagur 12. júní: Kynning og kennsla
Fimmtudagur 13. júní: Farið á völlinn og spilað

Í boði eru tvær tímasetningar þessa daga:
19:00–20:00
20:00–21:00

Námskeiðið er frítt fyrir meðlimi Golfklúbbs Suðurnesja en aðrir greiða 5.000 kr.
Fyrir þá sem síðan ganga í golfklúbbinn á árinu gengur gjaldið upp í árgjald.

Áhugasamir vinsamlegast skrái sig hér.

Eða sendi tölvupóst á gs@gs.is

Takmarkað sætaframboð og fyrstir koma, fyrstir fá!

Vinna við flatir

Á morgun munu vallarstarfsmenn slá og léttsanda flatir Hólmsvallar. Af þessu mun eitthvað rask hlótast og biðjum við félagsmenn afsökunar á því, hins vegar er þetta hluti af ferlinu við að halda Leirunni jafn góðri og hún er.

Næstu daga munu vallarstarfsmenn strauja flatir til að ná sandinum niður og ætti völlurinn að vera kominn í jafn gott form á mánudag gangi allt eftir.

Hola í höggi í öðru stigamóti GS

Atli Elíasson gerði sér lítið fyrir og fór holu í höggi á 13. holu Leirunnar í dag. Atli var að taka þátt í öðru stigamóti GS á þessu ári sem styrkt var af Kosmos & Kaos, svo skemmtilega vildi til að Guðmundur Sigurðsson, eigandi Kosmos & Kaos, var í holli með Atla þegar hann sló draumahöggið.


Skorkort Atla má sjá hér fyrir ofan en hann er lágforgjafarkylfingur (3.0) og lék af gulum teigum í dag. Þrettánda holan er 172m af gulum teigum svo þetta hefur verið ágætis högg hjá Atla sem lék á pari í dag og deilir efsta sæti í mótinu með Gunnari Þór Jóhannssyni. Gunnar lék af hvítum teigum og virðist kunna ágætlega á Leiruna, enda á hann vallarmet af hvítum teigum (65 högg) sem Axel Bóassyni einum hefur tekist að jafna.

Íslandsbanka- og Áskorendamótaröðin 2019

Stjórn Golfklúbbs Suðurnesja hefur ákveðið að bjóða öllum þátttakendum í Íslandsbankamótaröðinni og Áskorendamótaröð Íslandsbanka 2019 að leika Hólmsvöll í Leiru tvisvar sinnum í sumar án endurgjalds. Með þessu viljum við styðja við bakið á okkar yngstu kylfingum, veita þeim tækifæri til að auka hæfni sína og kynnast fleiri og fjölbreyttari völlum.

Einu skilyrðin sem GS setur eru að kylfingar hafi tekið þátt í fyrrgreindum mótum og að börn yngri en tólf ára hafi eldri fylgdarmann með sér. Sé fylgdarmanneskja ekki til taks en kylfingnum langar að leika Leiruna getur GS boðið honum félagsskap sé þess óskað með góðum fyrirvara.

Með golfkveðju fyrir hönd stjórnar GS,
Jóhann Páll Kristbjörnsson,
formaður


Núna um helgina hefst keppni í Íslandsbankamótaröðinni á Garðavelli á Akranesi og Áskorendamótaröðinni á Kálfatjarnavelli í Vogum.
Allar nánari upplýsingar um mótin má finna á golf.is.

Fyrir hönd Golfklúbbs Suðurnesja taka eftirtaldir kylfingar þátt í Íslandsbankamótaröðinni:

Auðunn Fannar Hafþórsson, Fjóla Margrét Viðarsdóttir, Kinga Korpak, Logi Sigurðsson, Róbert Smári Jónsson og Sveinn Andri Sigurpálsson.

Fyrir hönd Golfklúbbs Suðurnesja taka eftirtaldir kylifngar þátt í Áskorendamótaröðinni:

Einar Harðarson, Lovísa Björk Davíðsdóttir, Sólon Siguringason, Ingi Rafn William Davíðsson, Kári Siguringason, Skarphéðinn Óli Önnu Ingason og Snorri Rafn William Davíðsson.

Við óskum öllum keppendum góðs gengis og hvetjum GSinga til að mæta og hvetja sitt fólk. Áfram GS!

Hrútalykt í Leirunni

Það verður hrútalykt í Leirunni föstudaginn 31. maí þegar karlkylfingar úr GS og Setbergi munu etja kappi á Hólmsvelli í Leiru.

Þetta verður vonandi fyrsti af mörgum herrahittingum þessara klúbba en konur klúbbanna hafa haldið sambærileg vinkonumót mörg undanfarin ár.

Skemmtilegt mót þar sem eigast við karlkylfingar úr GS og Setbergi.

Keppnisfyrirkomulag er punktakeppni m. forgjöf (hæst gefin 28) og tíu bestu skor hvors klúbbs telja. Að auki verða ýmis aukaverðlaun sem verða kynnt þegar nær dregur.

Kylfingar skrá sig til leiks hjá GS (gs@gs.is) og mun mótsstjórn raða niður á teiga. Allir ræstir út samtímis (Shotgun) um kl. 17, eftir mót verður Fish’n’chips frá Issa og einn kaldur (innifalið í mótsgjaldi).

Nánari upplýsingar veitir formaður í síma 771-2121 eða í tölvupósti.is

Er kominn tími á ný grip?

Eru gömlu gripin slitin og sleip?

Við skiptum um gripin fyrir þig í golfverslun GS – nú er rétti tíminn.


Komdu með settið eða hafðu samband, í golfverslun GS færðu ný Pure Grips á settið þitt.
Við erum með nokkra liti af gripum á lager en hægt er að sérpanta aðra liti með stuttum fyrirvara.


Verð fyrir sveiflugrip með ásetningu er 2.000 kr. en GSingar fá 20% afslátt

1.600 kr. fyrir GSinga

Stigamótaröð GS hefst í næstu viku

Nú styttist í að keppnisgolfið hefjist hjá Golfklúbbi Suðurnesja, fyrsta stigamót sumarsins hefst þriðjudaginn 14. maí og nýtt fyrirkomulag verður á því í sumar.

Á síðasta aðalfundi GS var ný reglugerð um Stigamót GS (áður Þ-mótaröð GS) samþykkt. Helsta breytingin er að nú verður hægt að leika mótið á tveimur dögum (í flestum tilfellum), þ.e. að velja milli þess að leika á þriðjudegi eða miðvikudegi, nú eða bara leika báða dagana og betri hringurinn telur. Þá verður einnig keppt í sér karla- og kvennaflokki í hverju móti og veitt verðlaun í báðum flokkum.
Reglugerð um Stigamót GS má lesa hér.


Stigamótaröð GS er einnig keppni um sæti í sveitum GS

Reglugerð fyrir val í sveitir eldri kylfinga má sjá hér en Siggi Palli, íþróttastjóri GS, mun kynna sérstaklega á næstu dögum hvernig vali verður háttað í aðalsveitir klúbbsins.


Búið er að opna fyrir skráningu í mótið á golf.is en þeir kylfingar sem ætla að leika á miðvikudegi þurfa að skrá sig á rástíma og tilkynna þátttöku sína sérstaklega í skála fyrir hring. Óþarfi er að taka fram að þeir þurfa að hafa meðspilara með sér.

Breytingar á stjórn GS

Breytingar urðu á stjórn Golfklúbbs Suðurnesja í vikunni þegar Sigurrós Hrólfsdóttir sagði sig frá stjórnarmennsku.

Sigurrós hefur setið í stjórn á fjórða ár auk þess að sinna kvennastarfi klúbbsins af miklum myndarbrag og átt stóran þátt í öllu því öfluga starfi sem þar hefur átt sér stað.

Golfklúbbur Suðurnesja þakkar Sigurrós kærlega vel unnin störf fyrir klúbbinn og óskar henni velfarnaðar í hverju því sem hún tekur sér fyrir hendur.

Fyrir hönd GSinga,
Jóhann Páll Kristbjörnsson,
formaður Golfklúbbs Suðurnesja

Scroll to top