Fréttir

Sumarkveðjur úr Leirunni

Gleðilegt sumar kæru félagar.
Það er nú ekkert sérstaklega sumarlegt um að lítast í Leirunni þennan sumardaginn fyrsta, en eigum við ekki bara líta á það sem góðan fyrirboða fyrir komandi golfsumar? Fall er fararheill!

Vorið hefur ekki verið neitt sérstaklega gott með tilliti til golfiðkunar, veður hefur verið frekar niðurdrepandi og tafið gróanda á Hólmsvelli. En við lítum björtum augum fram veginn. Frá og með morgundeginum er komið sumar í Leirunni, fastur opnunartími í golfskálanum verður á virkum dögum frá 8.30 til 18.00 og 8.00 til 14.00 um helgar. Opnunartími lengist svo þegar líður lengra inn í tímabilið.

Í dag er golfskálinn opinn frá 9.00 til 13.00 og heitt á könnunni.


Á laugardaginn verður opið mót í Leirunni, veðurspá er með ágætum og búið er að opna fyrir skráningu á golf.is.

Ágætu GSingar, ég hlakka til skemmtilegs golfsumarsins með ykkur,
Jóhann Páll Kristbjörnsson
formaður Golfklúbbs Suðurnesja

Áfram vetrarvöllur í Leirunni

Enn er kalt í lofti og næturfrost, sumarflatirnar á Hólmsvelli eru því ekki í leik og völlurinn aðeins opinn félögum í GS laugardag og sunnudag (páskadag). Klúbbhús og veitingasala eru einnig lokuð.

FootJoy liðakeppni GS

Mótanefnd hefur sett á laggirnar nýtt mót fyrir félagsmenn í Golfklúbbi Suðurnesja, FootJoy liðakeppni GS. Liðakeppnin verður leikin í riðlum og hvert lið skipað sex leikmönnum en aðeins fjórir þeirra leika í hverri umferð.

Í hverri umferð verður leikinn einn fjórmenningur (Foursome) og tveir tvímenningar (Singles) með forgjöf. Í lok tímabils stendur eitt lið uppi sem Liðameistari GS.



Nánari upplýsingar um liðakeppnina má sjá hér.


Við hvetjum nú alla GSinga til að stofna lið og taka þátt í þessu skemmtilega móti, það er ekki á hverjum degi sem við fáum tækifæri til að keppa í holukeppni sem þessari.
Þess má geta að Golfklúbbur Grindavíkur hefur haldið samskonar mót við góðar undirtektir, formenn klúbbanna hafa rætt sín á milli um möguleikann á að sigurlið GS og GG etji kappi í lok tímabils … nánar um það síðar.

Páskar 2017

Í dag, skírdag, er völlurinn opinn frá kl. 10.00 (rástímaskráningar á golf.is). Tilboð á flatargjöldum 2.500 kr. (ath. flestir vinavallasamningar taka gildi 1. maí).

Yfir páskana verður Hólmsvöllur opinn eins mikið og hægt er, þó er kuldaspá og næturfrost í kortunum og líklegt að einhverja morgna verði völlurinn opnaður seinna líkt og í dag. Kylfingar eru hvattir til að fylgjast með á gs.is og golf.is.

Frábær æfingaferð til Morgado

Fyrstu vikuna í apríl fór Golfklúbbur Suðurnesja í vel heppnaða æfingaferð til Morgado í Portúgal. Alls fóru 12 iðkendur og þeim fylgdi stór hópur GSinga sem skemmti sér við kjöraðstæður á golfvöllunum.

Alla daga var æft í u.þ.b. þrjá tíma fyrir hádegi, síðan var farið í hádegismat og eftir það léku krakkarnir 9 eða 18 holur eftir getu … en þau allra yngstu gátu líka valið að fara í sund. Veðrið var frá 14°C á morgnana og fór í 25°C um miðjan daginn, engum þótti leiðinlegt að leika sér í golfi við þær aðstæður.
Á meðan krakkarnir æfðu gátu aðrir GSingar leikið golf á tveimur stórskemmtilegum 18 holu golfvöllum sem eru þarna, Morgado og Alamos. Fólk lék frá 18 til 36 holur á dag og svo fóru allir í sameiginlegan kvöldverð í klúbbhúsinu sem var með gott útsýni yfir völlinn.

„Ég er mjög stolt af þeim, þvílík framför sem margir eru að sýna. Mikill metnaður og framtíðin er svo sannarlega björt,“ sagði Karen um krakkana eftir ferðina.

Og það er strax farið að undirbúa ferð að ári.


Hér að ofan má sjá svipmyndir af krökkunum við æfingar

FootJoy mátunardagar í Leirunni

Í samstarfi við ÍSAM ætlum við að bjóða kylfingum í GS golffatnað frá FootJoy á einstöku tilboðsverði í næstu viku – aðeins þessa daga og aðeins fyrir GSinga!

Frá þriðjudeginum 18. apríl til föstudagsins 21. apríl verða sýnishorn af því nýjasta fyrir karla og konur frá FootJoy hjá okkur í golfversluninni í Leiru.

Opnunartímar til að máta og panta:

Þriðjudagur 9.00–16.00
Miðvikudagur 9.00–16.00 og 20.00–22.00
Fimmtudagur 9.00–16.00
Föstudagur 9.00–16.00 og 20.00–22.00

Við hvetjum GSinga til að nota tækifærið, mæta og gera góð kaup á frábærum golffatnaði frá FootJoy – golftímabilið er handan við hornið.
Greiðsla fer fram við pöntun.

Happdrætti Golfklúbbs Suðurnesja 2017: Dregið eftir páska

Af óviðráðanlegum orsökum verður því miður ekki hægt að draga í happdrætti Golfklúbbsins fyrr en eftir páska.

Um leið og búið er að draga verða vinningsnúmerin birt hér á síðunni gs.is. Við biðjumst velvirðingar og vonum að fólk sýni þessu skilning.

Við þökkum þeim sem keyptu miða og gerðu krökkunum með því móti kleyft að fara í frábæra æfingaferð til Portúgal, hafið það gott yfir páskana.

Scroll to top