Mánuður: júní 2019

Áætlaðir rástímar Meistaramóts barna og unglinga

Á mánudag hefst Meistaramót GS með keppni í barna- og unglingaflokkum, þá mun nýliðaflokkur einnig hefja leik sama dag.

Áætlaðir rástímar fyrir flokka barna og unglinga eru sem hér segir:

Hólmsvöllur:

Á mánudag og þriðjudag verður ræst út á milli kl. 10 og 12 í flokkum 14 ára og yngri og 12 ára og yngri.
Á miðvikudag verða flokkar 14 ára og yngri og 12 ára og yngri ræstir út á milli 14 og 16.

Jóel:

10 ára og yngri verða ræstir út kl. 11.15 á mánudag og þriðjudag.

Lokahóf og verðlaunaafhending verður í golfskálanum upp úr kl. 17 á miðvikudag, eða þegar allir hafa lokið leik.


Skráning á golf.is

Frágangur á hrífum

Það vefst fyrir mörgum hvernig eigi að ganga frá hrífum í glompum. Hér er sýnt hvernig eigi að ganga frá þeim eftir notkun í Leirunni. Þá er gott að minna á að þá á alltaf að raka glompur eftir sig.

Efri myndin sýnir hvernig á ekki að ganga frá hrífunni eftir notkun. Þegar hrífan er skilin eftir svona getur hún stoppað bolta á leiðinni í glompuna og þannig haft áhrif á leik.



Hrífuna á að skilja eftir í höggstefnu og hafa aftasta hluta hennar upp á bakkanum. Þannig eru minnstar líkur á að hrífan hafi áhrif á leik.


600

Ingi Þór Ingibergsson skráði sig í Golfklúbb Suðurnesja í gær og varð með því sexhundraðasti félagsmaðurinn

Af því tilefni að félagafjöldi GS rauf 600 félaga múrinn ákvað stjórn GS að bjóða Inga Þór sérstaklega velkominn í klúbbinn og fékk hann af því tilefni boltakort á æfingasvæðið, kennslutíma hjá Sigurpáli og fría þátttöku í Meistaramóti GS sem fer fram í næstu viku. Eins og sjá má var Ingi Þór hinn ánægðasti þegar formaður færði honum tíðindin.

Velkominn Ingi 600!

Nýliðaflokkur í Meistaramóti 2019

Ákveðið hefur verið að bjóða upp á nýliðaflokk í Meistaramóti GS 2019. Nýliðaflokkur leikur 3×9 holur, frá mánudegi til miðvikudags.

Mikil fjölgun hefur orðið á nýliðum í klúbbnum og nýliðanámskeiðin hans Sigga Palla tókust vonum framar, færri komust að en vildu.

Nýliðaflokkur:

Í nýliðaflokkinn geta allir nýliðar skráð sig, þ.e. þeir sem hafa gengið í klúbbbinn á árinu og einnig þeir sem hafa sótt nýliðanámskeiðin. Rástímar eru áætlaðir frá kl. 17 alla dagana. Vanir kylfingar munu ganga með ráshópunum og liðsinna eftir þörfum.
Innifalið í mótsgjaldi er lokahóf Meistaramótsins (fyrir átján ára og eldri) sem fram fer á laugardagskvöldinu, þar verður glæsilegur kvöldverður fram borinn og verðlaunaafhending fer fram að honum loknum.

Við hvetjum alla nýliða að taka þátt í Meistaramótinu, skemmtilegasta móti ársins, og mæta á lokahófið til að kynnast öllu því skemmtilega fólki sem er í Golfklúbbi Suðurnesja.

Með golfkveðju frá mótssjórn Meistaramóts


Hægt er að skrá sig á golf.is, gs@gs.is eða með því að hringja í golfskálann í síma 421-4100.

Tilkynning frá mótsstjórn Meistaramóts 2019

Á síðasta aðalfundi Golfklúbbs Suðurnesja samþykktu félagar nýja reglugerð um Meistaramót GS.


Helstu áherslubreytingar sem voru gerðar frá fyrri Meistaramótum:

Skráningarfrestur er til klukkan 12.00 daginn fyrir fyrsta keppnisdag.
Mótsstjórn raðar keppendum á rástíma; fyrstu tvo dagana er dregið í ráshópa en seinni tvo dagana ræður skor rástímum (á lokahring sé um þriggja daga mót að ræða).

Mótsstjórn getur veitt undanþágu frá þessari reglu séu rök keppanda sterk og það sé mat mótsstjórnar að undanþága veiti viðkomandi ekki forskot á aðra keppendur. Umsóknir um undanþágur þurfa að berast mótsstjórn í síðasta lagi sunnudaginn 30. júní í tölvupósti á gs[at]gs.is, eftir það verða umsóknir um undanþágur ekki teknar til greina.


Golfbílar eru ekki leyfðir nema keppandi fái undanþágu frá mótsstjórn, undanþágur skulu aðeins veittar þeim kylfingum sem eiga erfitt um leik heilsu sinnar vegna.

Mótsstjórn hefur ákveðið að keppendum í flokki 65 ára og eldri er sjálfkrafa veitt undanþága en aðrir þurfa að sækja um undanþágu hjá mótsstjórn í síðasta lagi n.k. sunnudag í tölvupósti.


Hlökkum til að sjá sem flesta í Meistaramótinu, skemmtilegasta móti ársins!
Golfkveðja frá mótsstjórn

Meistaramótið verður dagana 1.–6. júlí

Meistaramót barna og unglinga verður haldið 1.–3. júlí og einnig flokkur nýliða (nánar auglýst síðar), Meistaramót fullorðinna fer fram 3.–6. júlí og er búið að opna fyrir skráningu á golf.is.

Kylfingar eru beðnir að kynna sér nýja reglugerð sem var samþykkt á síðasta aðalfundi. Helsta breyting frá fyrri Meistaramótum er að nú verður ekki hægt að velja rástíma fyrstu tvo dagana eins og hefur tíðkast.

Áætlaðir rástímar 3. júlí (birt með fyrirvara um fjölda þátttakenda):

Meistaraflokkur karla 8:30-9:20
Meistaraflokkur kvenna 9:30
Öldungaflokkur karla 65+ 9:40-9:50
1. flokkur karla 10:00-10:10
1. flokkur kvenna 10:20-10:30
2. flokkur karla 10:40-11:30
2. flokkur kvenna 11:40-11:50
3. flokkur karla 12:00-12:30
4. flokkur karla 12:40-12:50
Opinn flokkur kvenna (54 holur) 13:00-13:20
Opinn flokkur karla 13:30-13:50
Opinn flokkur kvenna (27 holur) 14:00-14:20

Á öðrum degi snúast rástímar við, þ.e. Opinn flokkur kvenna (27 holur) hefur leik og Meistaraflokkur karla verður síðastur út.

Nándarverðlaun á öllum par 3 brautum Leirunnar í Meistaramóti (næstur holu eftir fjóra daga) – aukaverðlaun fyrir holu í högg (sem telst ekki vera næst holu heldur í holu).

Reglugerð Meistaramóts má lesa hér

Við hvetjum alla GSinga til að taka þátt í þessum hápunkti félagsstarfs klúbbsins,
mótssjórn Meistaramóts

Geysisdeildin er byrjuð að rúlla

Það var vel við hæfi að Geysisdeildin færi af stað á lýðveldisdeginum 17. júní þegar Hinir útvöldu og Forsetar áttust við í rjómablíðu Leirunnar.

Þrátt fyrir að vera án efa laglegasta og best klædda lið deildarinnar (proof me wrong) þá þurftu Forsetar að lúta í gras gegn feikiöflugu liði Hinna útvöldu, 2½–½.

Hinir útvöldu: Þorgeir Ver Halldórsson (fyrirliði), Jóhannes Þór Sigurðsson, Pétur Már Pétursson og Halldór Ragnarsson.
Forsetar: Snæbjörn Guðni Valtýsson (fyrirliði), Sveinn Björnsson, Jóhann Páll Kristbjörnsson og Jóhann Issi Hallgrímsson.

Frá mótsstjórn: Liðsstjórar athugið að fyrstu umferð lýkur 25. júní, ef leikir hafa ekki verið leiknir og úrslit kynnt mótsstjórn fyrir 26. júní verða úrslit leikjanna jafntefli.

Hér má sjá riðla og leiki Geysisdeilarinnar 2019

Fjóla Margrét með brons

Frábær árangur hjá Fjólu (12 ára) sem vann Pamelu Ósk Hjaltadóttur (GR) rétt í þessu 1/0 í leik um þriðja sætið.

Fjóla lék til undanúrslita í morgun gegn Helgu Signý Pálsdóttur (GR) og tapaði þeim leik naumlega á lokaholunni.

Fjóla sýnir það og sannar að æfingin skapar meistarann en hún leggur sig hart fram og er einstaklega iðin og samviskusöm við æfingarnar. Á síðasta ári var hún heiðruð fyrir mestu lækkun forgjafar á lokahófi barna- og unglingahóps GS svo þessi frammistaða kemur svo sem ekkert á óvart. Þessi stelpa á eftir að ná langt.

Riðlar og lið Geysisdeildarinnar 2019

Í gær var dregið í riðla Geysisdeildarinnar og á meðfylgjandi tengli má sjá riðlana, liðin og leikjaröðun.


Einhverrar óvissu gætti hjá yngsta liði keppninnar (meðalaldur rétt rúmlega fermingaraldur) en þau höfðu skilað inn nafninu No Name, endurnefndu þau liðið sitt Champs 2023. Þá hefur liðið Dialed in fengið heimild mótsstjórnar að fullmanna lið sitt áður en þeirra fyrsti leikur hefst.

Smelltu hér til að sjá riðla Geysisdeildarinnar.


Mótsstjóri er Jóhann Páll Kristbjörnsson (johann@gs.is, 771-2121)

Scroll to top